‘yan ta’adda sun yi Garkuwa da kimanin mutane 36 mazauna unguwar Keke B da ke Millennium city a karamar hukumar Chikun a jihar Kaduna.
Lamarin dai, kamar yadda wakilin Daily trust ya rahoto, ya faru ne a daren ranar Litinin.
Wani ganau ya shaida cewa ‘yan bindigar sun gudanar da ayyukansu tsawon Sa’o’i suna bi gida bayan gida babu wanda ya iya kalubalantarsu.
A cewar Muhammad Salihu, wani mazaunin garin, “Da yawa daga cikinmu muna kofar gidajenmu lokacin da ‘yan bindigar suka kawo harin, da misalin karfe 8:30 na dare suka zo. Sun zo da adadi mai yawa, suna harbe-harbe a sama ba kakkautawa.
Kawo yanzu dai, babu wani bayani a hukumance daga hukumomin tsaro har zuwa lokacin tattara wannan rahoton.
Kokarin da aka yi na jin ta bakin kakakin rundunar ‘yan sanda ta Kaduna Mohammed Jalige ya citura, sakamakon cewa, layinsa a kashe yake.
