Rundunar Ƴansandan Metropolitan ta Birtaniya ta bayyana cewa ta kama kuma ta gurfanar da babban wanda ake zargi, Andre Wright-Walters, bisa zargin kisan wani ɗan Nijeriya mai shekara 67, James Gbadamosi.
Jaridar PUNCH Metro ta rawaito daga wata sanarwa da ƴan sandan Metropolitan suka fitar a ranar Litinin cewa an kai wa Gbadamosi hari tare da dukan sa a ranar 24 ga watan Agusta a Ballam High Road da misalin ƙarfe 4 na yamma, lamarin da ya jawo masa munanan raunuka masu barazana ga rayuwa.
- An Sake Daure Dan Nijeriya Shekara Biyar A Birtaniya Kan Laifin Fyade
- Iran Ta Zargi Birtaniya, Faransa, Da Jamus Da Gazawa Kan Yarjejeniyar Nukiliyar 2015
Bayan samun wannan bayani, jami’an ƴan sanda suka dira wurin da aka kai harin a Balham High Road, suka garzaya da Gbadamosi zuwa asibiti.
Sanarwar ta nuna cewa, duk da haka, Gbadamosi ya kasa jure raunukan da ya samu inda ya rasu a ranar Juma’a.
Sanarwar ta ce, “An kira ƴan sanda bayan rahoton cewa an kai wa wani mutum hari a Balham High Road da misalin ƙarfe 3:40 na rana a ranar Lahadi, 24 ga Agusta.
Wani mutum mai shekara 67 aka kai asibiti da raunuka masu barazana ga rayuwa, abin takaici kuma ya rasu a asibiti a ranar Juma’a, 5 ga Satumba. An bayyana sunansa da James Gbadamosi.”
Bayan faruwar lamarin, ƴan sanda sun bayyana cewa sun kama Wright-Walter mai shekaru 37, suka gurfanar da shi bisa laifin kai hari a watan Agusta, amma aka ba da belinsa.
Sai dai an sake kama shi a ranar Asabar bayan rasuwar Gbadamosi, sannan aka gurfanar da shi a gaban kotun majistare a ranar Litinin.
Sanarwar ta ci gaba da cewa: “Andre Wright-Walters, mai shekaru 37 (05.02.1988) na Aɓery Hill, Greenwich, an gurfanar da shi a ranar Lahadi, 7 ga Satumba. Ya bayyana a gaban kotun majistare ta Wimbledon a ranar Litinin, 8 ga Satumba. An kama Wright-Walters bisa zargin kisa a ranar Asabar, 6 ga Satumba.”
“A baya an riga an gurfanar da shi a ranar Laraba, 27 ga Agusta, bisa zargin yin mummunan lahani da gangan da kuma mallakar miyagun ƙwayoyi rukuni na A, bayan an kama shi a ranar da abin ya faru.
Ya bayyana a gaban kotun majistare ta Wimbledon a ranar Alhamis, 28 ga Agusta, sannan aka sake shi a kan beli don sake bayyana a gaban kotun ƙoli ta Kingston-upon-Thames a ranar Laraba, 24 ga Satumba.”
Ƴansanda sun ƙara da cewa an kuma kama wani wanda ake zargin abokin haɗin gwiwa (ba a bayyana sunansa ba) bisa zargin da ya shafi kisan, amma aka ba shi beli yayin da ake ci gaba da bincike.
