Fashewar Tankar Mai Ta Yi Ajalin Mutune, Ta Jikkata 300 A Jigawa

Wata tankar man fetur ta fashe a garin Majiya da ke ƙaramar hukumar Taura a Jihar Jigawa daura da babbar hanyar Kano zuwa Hadejia.

Lamarin ya faru ne da misalin ƙarfe 11:45 na daren jiya Talata.

• An Yi Musayar Yawu Tsakanin Macron Da Netanyahu Kan Rikicin Gabas ta Tsakiya
• Xi Ya Bukaci Bunkasa Tsarin Dabarun Soja Na Zamani

Wuta ta dinga ci har zuwa 3:15 na Asubar yau Laraba, kamar yadda Mansur Ahmed, mai taimaka wa tsohon gwamnan Jigawa kan harkokin yaɗa labarai ya wallafa a shafinsa Facebook.

A cikin sakon Ahmed, ya bayyana cewa, aƙalla mutane 300 ne suka samu munanan raunuka, kuma da yawa wanda kawo yanzu ba a tantance adadin su ba sun rasa rayukansu, sakamakon gobarar da ta auku sanadiyyar fashewar tankar man.

Kawo yanzu dai babu wata sanarwa a hukumance daga rundunar ‘yansandan jihar ko wata hukuma dangane da aukuwar gobarar har zuwa lokacin haɗa wannan rahoto.