Ahmed Musa Ya Angwance Da Matarsa Ta 4 A Kano

Kyaftin din tawagar Super Eagles ta Nijeriya Ahmed Musa, ya auri matarsa ta 4, Asmau Moriki, a wani biki na sirri da aka gudanar a jihar Kano, Musa da amaryarshi Asmau sun zama mata da miji watanni kadan bayan haduwarsu, Musa ya bar sansanin tawagar Super Eagles dake birnin Landan domin ya halarci bikin wanda aka gudanar a birnin Kano.

Dan wasan dake taka leda a kungiyar kwallon kafa ta Kano Pillars, ya shiga wasan da Nijeriya ta doke Ghana da ci 2-1 a minti 60 na wasan, Musa na daya daga cikin yan wasan da sukafi taka leda a tarihin tawagar kwallon kafa ta Nijeriya inda kuma ya zamo wanda yafi jefawa Nijeriya kwallaye a gasar kofin Duniya a tarihinta.

• Kamfanoni Masu Jarin Waje Sun Ci Gajiyar Tsarin Kasar Sin Na Samar Da Rangwamen Gwamnati Ta Musayar Sabbin Kayayyaki Da Tsofaffi
• Trump Zai Shirya Liyafar Musamman Ga Manyan Ƴan Crypto 

Musa ya yi aurenshi na farko a shekarar 2013 inda ya auri Jamila, ma’auratan, wadanda suka haifi ‘ya’ya biyu sun rabu a shekarar 2017 bayan wata hatsaniya ta ma’aurata wadda ake alakantawa da burin da Musa kedashi na kara aure ya shiga tsakaninsu a wancan lokacin, jim kadan bayan rabuwar, ya auri Juliet Ejue, matar sa ta biyu, daga Ogoja a jihar Kuros Riba.

Har wayau aurensu da Juliet ya rabu duk da cewa ba a san takamaiman dalili ko lokacinda auren ya rabu ba, a shekarar 2021, ya auri Mariam wadda ita ce ta zama matarsa ta uku, sai yanzu kuma a ranar 30 ga watan Mayun 2025 aka daura auren Musa da Asmau Moriki wanda ya kasance aure na hudu da aka san tauraron dan wasan yayi, rahotanni sun bayyana cewa an gudanar da daurin auren cikin kwanciyar hankali a Kano kuma ya samu halartar ‘yan uwa da abokan arziki.