Saƙon Barka Da Sallah: Tinubu Ya Baiyana Tabbacin Ci Gaban Nijeriya, Da Sauyin Tattalin Arziƙi

A cikin saƙonsa na bikin Sallah na shekarar 2025, Shugaba Bola Tinubu ya tabbatar wa ‘yan Nijeriya cewa ƙasar na kan hanya madaidaiciya zuwa ga murmurewa da ci gaban tattalin arziki. Ya amince da wanzuwar wahalhalun da ‘yan ƙasa ke fuskanta sakamakon wasu gyare-gyare da gwamnatinsa ta aiwatar, amma ya bayyana gamsuwa cewa waɗannan matakai sun fara haifar da sakamako mai kyau. Tinubu ya bayyana cewa gyare-gyaren ba su da nufin sauƙi nan take, sai dai a gina tubalin ci gaba mai ɗorewar.

Shugaban ya buƙaci ƴan ƙasa su rungumi ainihin ma’anar bikin Sallar Layya ta hanyar yin sadaukarwa, da biyayya, da tawali’u kamar yadda Annabi Ibrahim (AS) ya yi. Ya buƙaci al’umma da su ɗauki wannan lokaci na Sallah a matsayin dama ta sabunta niyyar aiki tuƙuru don ci gaban ƙasa da zaman lafiya.

• Bikin Sallah Babba Tare Da Malta Guinness A Kano
• Yanzu-yanzu: Gwamnatin Neja Ta Soke Hawan Sallah Sakamakon Ambaliyar Ruwan Mokwa

Tinubu ya bayyana cewa duk da cewa tafiyar ba ta kasance mai sauƙi ba, irin jajircewar shugabannin kasuwanci da na gwamnati, da kuma goyon bayan da yawancin ‘yan Nijeriya suka bayar, sun taimaka wajen ganin gyare-gyaren sun fara samun nasara. Ya ce yanzu ƙasar na shigowa sabon zamani na fatan alheri da ci gaba, wanda aka yi alƙawari shekaru biyu da suka wuce.

Ya kuma jaddada cewa gwamnati za ta ci gaba da ɗaukar matakan da suka fi dacewa domin tabbatar da cewa sakamakon waɗannan gyare-gyaren sun amfanar da rayuwar ‘yan ƙasa a zahiri, ba wai ƙididdiga kawai ba. Tinubu ya bayyana cewa shirin “Sabon Fata” na gwamnatinsa na da nufin kawo walwala ga kowanne ɗan Nijeriya.

A ƙarshe, ya yi kira da a nuna tausayi da kulawa da juna a wannan lokaci mai albarka, ba tare da la’akari da bambancin addini ko yare ba. Ya kuma buƙaci addu’o’i ga jami’an tsaro da shugabanni a kowane mataki, tare da fatan Allah ya karɓi ibadun al’umma a wannan lokaci na Sallah.