Tsohon Babban Alƙalin Nijeriya  Mohammed Uwais Ya Rasu Ya Shekara 89

Tsohon Babban Alkalin Nijeriya (CJN), Mai Shari’a Mohammed Uwais, ya rasu yana da shekaru 89. Rahotanni daga cikin iyalinsa sun tabbatar da rasuwarsa a safiyar Juma’a, 6 ga Yuni, 2025, a birnin Abuja.

An fara shirye-shiryen gudanar da Sallar jana’iza da binne marigayin kamar yadda addinin Musulunci ya tanada.

An haifi Mohammed Uwais a ranar 12 ga Yuni, 1936. Ya riƙe muƙamin babban Alƙalin Nijeriya daga shekarar 1995 zuwa lokacin ritayarsa a 2006.

Bayan ya bar aikin kotu, marigayi Uwais ya shugabanci kwamitin gyaran dokar zaɓe a lokacin Marigayi Shugaba Umaru Musa Yar’Adua, inda ya taka muhimmiyar rawa wajen inganta tsarin zaɓe a ƙasar a Nijeriya.

A ƙarƙashin jagorancinsa ne aka fitar da rahoton gyaran zaɓen da ya janyo hankalin ƙasa da ƙasa, wanda har yanzu ake nazari da amfani da shi wajen ci gaban tsarin dimokuraɗiyya a Nijeriya. Allah ya jikansa da rahama.