Dangote Ya Sanya Wa Hanya Sunan Tinubu, Zai Kashe Naira Biliyan 900 Don Gina Hanyoyi A Nijeriya

Shugaban Kamfanin Dangote, Aliko Dangote, ya sanar da cewa za a kira hanyar da ke kaiwa zuwa sabuwar matatar mai ta Dangote da sunan Bola Ahmed Tinubu Road, domin girmama Shugaba Bola Ahmed Tinubu.

A wannan taron da aka yi ranar Alhamis, Dangote ya kuma bayyana cewa kamfaninsa zai kashe kusan N900 biliyan don gina manyan hanyoyi a fadin kasar.

• Karuwar Darajar Sana’ar Samar Da Kayan Laturoni Da Dangoginsu a Sin Cikin Watanni 4 Na Farkon Bana Ya Karu Da 11.3% 
• Matatar Dangote Ta Sake Rage Farashin Man Fetur

Daga cikin wadannan, akwai hanyar Deep-Sea Port Access Road da ke hade tashar jiragen ruwa ta Lekki, yankin kasuwanci kyauta, da kuma matatar mai ta Dangote zuwa babbar hanyar Sagamu-Benin.

“Wannan shirin matatar mai, da gaske tunanin ku ne,” in ji Dangote ga Shugaba Tinubu. “Don haka, mun yanke shawarar sanya wa babbar hanyar mu sunan ku – Bola Ahmed Tinubu Road.”

Dangote ya yaba wa Shugaba Tinubu saboda goyon bayansa ga ‘yan kasuwa, inda ya tuna yadda shugaban ya kafa yankin kasuwanci kyauta a Legas a lokacin da yake gwamna.

A shekarar da ta gabata, kamfanin Dangote ya biya haraji N450 biliyan – wanda ya fi dukkan bankunan Nijeriya suka hada jarin harajin da suka biya.

Wannan shiri na gina hanyoyi yana cikin shirye-shiryen gwamnati na ba da rangwamen haraji domin inganta kayayyakin more rayuwa a kasar.