Sin Na Maraba Da Karin ‘Yan Kasuwar Ketare Dake Son Gudanar Da Hada-hada Don Cimma Moriyar Juna

Rahotannin baya-bayan nan na cewa, karin ‘yan kasuwa na fadada zuba jari a kasar Sin. Har ma cibiyar bunkasa cinikayya ta kasar Denmark dake Sin, da takwararta ta kasar Jamus suka bayyana cewa, kamfanonin kasashen Turai na da cikakken imani game da ci gaba da zuba jari a Sin.

A daya hannun kuma, ita ma cibiyar bunkasa cinikayya ta Amurka dake Sin, ta ce bisa binciken baya-bayan nan, akasarin kamfanonin Amurka ba su da niyyar ficewa daga Sin. Yayin da karin kamfanonin waje ke fadada fannonin bincike da samar da hajoji, da kirkire-kirkire don inganta hada-hada a cikin kasar ta Sin.

Game da hakan, kakakin ma’aikatar harkokin wajen kasar Sin Lin Jian, ya bayyana a yau Talata cewa, yadda karin ‘yan kasuwar kasashen ketare ke dada rungumar Sin, na shaida daidaito, da tabbaci, da ci gaba mai inganci da Sin ke samu, yayin da manufar kara bude kofa ta Sin ke samar da damammaki, da yadda sauran sassan duniya ke martaba hakan. Kazalika, hakan sakamako ne na kyakkyawan yanayi da Sin ta samar, karkashin sabon tsarin samar da hajoji masu inganci, da dabarun kirkire-kirkire.

Lin ya kara da cewa, tun daga fannin kamfanonin kere-keren manyan hajoji zuwa cibiyoyin kirkire-kirkire, Sin ta ci gaba da samarwa duniya damammaki karkashin ci gabanta. Har ila yau, Sin na maraba da zuwan karin kamfanonin waje, don gudanar da harkoki bisa mahangar kasa da kasa, da cimma nasarorin bai daya, da sakamako ga kowa, yayin da Sin din ke burin gabatar da sabon karfi na samar da hajoji masu matukar inganci. (Saminu Alhassan)