Har Yanzu Ba Mu San Inda Za A Binne Dantata Ba — Sakatarensa

Sakataren marigayi Alhaji Aminu Alhassan Ɗantata, Mustapha Abdullahi Junaidu, ya ce har yanzu ba su yanke shawara kan inda za a binne marigayin ba.

A wata hira da aka yi da shi a gidan rediyon Premier Radio da ke Kano, Mustapha ya ce Ɗantata ya bar wasiyya cewa idan ya rasu, a binne shi a Madina.

• Hukumar NPA Na Son Tara Kuɗaɗen Shiga Naira Tiriliyan 1.2 A 2025
• An Horas Da Kwararrun Ma’aikata Sama Da Dubu 500 Karkashin Hadin Gwiwar Sin Da Sassan Kasa Da Kasa A Fannin Inganta Kwarewar Ma’aikata

Marigayi Ɗantata ya rasu ne daren jiya Juma’a a birnin Dubai, ƙasar Haɗaɗɗiyar Daular Larabawa.

“Muna tattaunawa da hukumomi a Madina. Har yanzu muna jiran amincewarsu domin yana yawan faɗa mana cewa yana so a binne shi a can,” in ji Mustapha.

Ya ƙara da cewa Gwamnatin Tarayya ma tana ƙoƙarin ganin an cika masa wannan burin, amma saboda yau Asabar ce, babu aiki l, shi ya sa ake samun jinkiri wajen cike takardu.

Mustapha ya ce idan lokaci ya ƙure kuma ba a samu amincewa daga Madina ba, za su dawo da gawar zuwa Kano domin a yi masa sutura.

Don haka, har yanzu ba su yanke shawarar ainihin inda za a binne shi ba.

Alhaji Aminu Alhassan Ɗantata ya rasu yana da shekaru 94, kuma mutane da dama sun aike da saƙon ta’aziyyarsu, ciki har da Shugaban Ƙasa Bola Ahmed Tinubu, Alhaji Atiku Abubakar, Rabiu Musa Kwankwaso da wasu shugabanni da dama.