Wani Ya Yi Alkawarin Auren Matashiyar Da Aka Yi Wa Sanadin Rasa Kafa A Sakkwato

Wani matashi ya yi alkawarin auren Fatima Sulaiman da wani matashi ya yi wa sanadin rasa kafa bayan kammala jarabawa NECO a Jihar Sakkwato.

Matashin mai suna Isma’ila Basawa, ya bayyana wa LEADERSHIP Hausa, cewa shi tun ranar da  ya ji labarin yadda Fatima ta tsinci kanta, Allah ya jefa masa sonta a zuciyarsa.

• Nijeriya Da Amurka Sun Kulla Yarjejeniyar Dawo Da Kudaden Da Abacha Ya Wawure
• Kyan Alkawari Cikawa

Isma’il ya kara da cewa bai samu natsuwa ba sai da ya tashi daga Zariya zuwa Sakkwato don su yi ido biyu da Fatima.

Matashin ya ce “A gaskiya duk da halin da Fatima ke ciki ta gamsu da ziyarar dana kai mata kuma iyayenta sun karbe ni hannu biyu tare da sanyawa burina albarka nan take”

Tuni matashin ya karyata zargin da wasu ke masa na cewa ya ga kyaune da Allah yayi wa Fatimar a zahiri.

Ya ce shi Allah ne ya jefa masa kaunar Fatima a zuciyarsa don haka sai inda karfinsa ya kare.

Matashin yayi kira ga gwamnatin tarayya da ta jiha da su taimaka wajen bin kadi akan wanda yayi sanadin salwantar kafarta.

Kuma yayi godiya ga dukkan mutanen da suka nuna tausayawarsu akan abin da ya faru da ita.

Yayi fatan Allah ya bata koshin lafiya .