Rundunar ‘yan sandan Kano ta ce wani matashi dan shekara 28 mai suna Sulaiman Idris da matarsa Maimuna Halliru mai shekaru 20 a ranar Litinin din da ta gabata, sun rasu a kan gadon aurensu yayin da suka kunna wutar gawayi suna dumama dakinsu.
Hakan na kunshe ne a cikin wata sanarwa da jami’in hulda da jama’a na rundunar ‘yan sandan (PPRO) SP Haruna Kiyawa, na rundunar ‘yan sandan jihar Kano ya fitar.
A cewar sanarwar, ma’auratan sun kwanta barci ne a ranar 02/01/2023 da misalin karfe 11:00 na dare.
“A ranar 03/01/2023 da misalin karfe 9:00 na dare ne aka samu rahoto daga kauyen Kwa da ke karamar hukumar Dawakin Tofa a jihar Kano cewa wasu ma’aurata Sulaiman Idris mai shekara 28 da matarsa Maimuna Halliru mai shekara 20 sun mutu a cikin dakinsu bayan rashin ganinsu a waje tun da misalin karfe 11:00 na daren ranar Litinin 02/1/2023.,” in ji sanarwar.
A cewarsa, binciken da aka yi ya nuna cewa sun kunna wutar gawayi ne domin dumama dakinsu sabida yanayin sanyi da ake ciki, sai hayakin gawayin ya turnuke su yayin da suke barci.
