An Ba Ni Kyautar Miliyan 150 Da Motar Miliyan 80 Don Na Bar Tafiyar Atiku – Sarkin Waka

Fitaccen mawakin Kannywood, Naziru Ahmad wanda aka fi sani da Sarkin Waka, ya bayyana cewar an ba shi kyautar miliyan 150 da motar miliyan 80 don ya daina goyon bayan dan takarar shugaban kasa na jam’iyyar PDP, Atiku Abubakar.

Sarkin Waka dai na daga cikin manyan mawakan da suka shigar tafiyar PDP, kuma shi ne wanda ya yi wakar ‘APC Sai Mun Ba Ta Wuta…’

• Duk Wanda Zai Yi Noma Ya Tabbatar Da Kiyaye Lokaci – AFAN
• Bashin Dala Miliyan 350 Da Kaduna Ta Ciyo: Nasara Ko Akasinta?

Mawakin na Kannywood ya yi fice wajen yi wa masu sarautar gargajiya wakoki, wanda hakan ne ya sanya Sarkin Kano murabus, Sanusi Lamido Sanusi II, ya yi masa sarautar ‘Sarkin Wakar Sarkin Kano’.

Naziru ya bayyana hakan ne cikin wata hira da ya yi da gidan rediyon DW a karshen mako, sai dai ya ce ya ki amince da tayin da aka masa saboda Atiku ya fi dukkanin ‘yan takarar da suka fito neman shugabancin Nijeriya nagarta.

Sai dai mawakin bai bayyana wadanda suka yi masa wannan tayin na romon baka ba.

“An tambaye ni na bar tafiyar Atiku na koma ta wani dan takara don a ba ni kyautar miliyan 150 da motar miliyan 80 amma na ki karba. Na ki karba ne saboda Atiku na san zai samar sa shugabanci na gari a Nijeriya.

“Ta ya zan goyi bayan tafiyar Tinubu mutumin da ba shi da cikakkiyar lafiya? Addininmu ma ya mana umarni da zabar lafiyayyen shugaba kuma yana daga cikin matakan shugabanci,” in ji Naziru.