Abba Ibrahim Wada

Tawagar kwallon kafa ta Nijeriya tana mataki na biyu a rukuni na 12 a wasan neman shiga gasar cin kofin nahiyar Afirka da za a yi a 2027. Hakan ya biyu bayan da Guinea Bissau ta doke Super Eagles 3-0 a wasan cikin rukuni a satin da ya gabata a filin wasa na Estádio Nacional 24 de Setembro. Kawo yanzu, da wannan sakamakon Guine Bissau ce ta daya a kan rukuni na 12 da maki shida, bayan da ta fara nasara a kan tawagar kasar Tanzaniya 2-0 a wasan farko a rukunin. Ita kuwa Nijeriya tana da maki uku, saboda doke Madagascar 2:1 a wasan farko da ta yi a Uyo, yayin da Madagascar da Tanzaniya suke da maki daya kowwacce. Me wannan rashin nasara da Super Eagles ta yi a Guinea Bissau ke nufi? Mai koyar da ‘yanwasan tawagar Super Eagles ta Nijeriya, Eric Chelle ya bayyana cewa daga dalilan da ya sa suka yi rashin nasara har da rashin fili mai kyau da suka buga da Guinea Bissau da kuma rashin kyawun yanayi, sai dai ya ce ba su taka rawar da ya kamata su samu maki ba a fafatawar. Rabon da Super Eagles ta yi rashin nasara da aka zura mata kwallaye da yawa tun wasan sada zumunta da Portugal da yi rashin nasara 4:0 ranar 17 ga watan Nuwambar 2022. Kafin nan kuma Sifaniya ta doke Nijeriya 3:0 ranar 23 ga watan Yuni a 2013 a FIFA Confederation Cup. Kenan ba kasafai ake zura kwallaye da yawa a ragar Super Eagles ba, amma mai ya sa Guinea Bissau ta yi wannan namijin kokarin. A tarihin karawar tsakanin kasashen biyu, Guinea-Bissau ta samu nasara daya a wasannin baya, yayin da Nijeriya ta ci fafatawa uku cikin karawa hudu da suka gabata, kafin wannan da suka kara a Guinea Bissau. A wasan neman gurbin AFCON na 2023, Guinea-Bissau ta ci Nijeriya 1:0 a Abuja, kafin Super Eagles ta rama da ci 1:0 a Bissau. Rashin nasarar da Nijeriya ta yi a wannan karawar ya sa za ta sake shiga cikin matsi a wasannin da suke gabanta, domin neman gurbin AFCON 2027. Amma masana na ganin irin wannan sakacin ne ya sa Super Eagles ta kasa samun gurbin shiga gasar kofin duniya da aka yi a Amurka da Kanada da Medico, duk da cewar kasashe 10 ne ta wakilci Afirka a babbar gasar kwallon kafa ta duniya. Za a gabatar da gasar cin kofin Afirka tsakanin kasashe uku da suka hada da Kenya da Uganda da kuma Tanzaniya a shekarar 2027. Rukuni na 12 ya kunshi Guine Bissau da Nijeriya da Tanzani da kuma Madagascar kenan tun da mai masukin baki tana cikin rukunin kenan kasa daya ce ba za ta samu tikitin shiga wasannin ba a cikin rukunin. Kenan duk wadda ta kammala wasaninta da maki mafi rinjaye, ita ce za ta je babbar gasar kwallon kafa ta Afirka da za a yi a badi a 2027. Ita Tanzani da take mai masaukin baki tana cikin wannan rukunin ne, domin ta samu damar hada yan kwallon da za su taka mata rawa a wasannin badi.

Waye Da Gaskiya Tsakanin Ronaldo Da Jorge Jesus?

by Abba Ibrahim Wada

October 11, 2026

0

Ra’ayin mutane ya banbanta musamman a kan takaddamar da ake yi ko kuma ta bullo tsakanin danwasa Cristiano Ronaldo da kociyan tawagar ‘yanwasan Portugal, Jorge Jesus. Sai dai magoya bayan Portugal sun fara ganin yadda tawagar ta buga wasa ba tare da Cristiano Ronaldo ba, bayan da kasar ta doke Denmark da ci 4-2 a gasar Nations League ranar Alhamis. Joao Cancelo da Goncalo Ramos ne suka bai wa bakin damar cin kwallo biyu, yayin da Mikkel Damsgaard da Rasmus Hojlund suka farke wa Denmark. Tsohon dan wasan Manchester United, Hojlund, ya yi murnar cin kwallon da ya ci da kwaikwayon salon yadda Ronaldo ke yi 'Siuuu' da zarar Ronaldo ya zura kwallo a raga - kuma wannan ne karo na biyu da Hojlund ya yi irin haka a wani lokaci da suka fafata da Portugal. dan wasa bitinha ne ya sake ci wa Portugal kwallo ta uku, sannan Joao Felid ya kara ta hudu a wasan da aka buga a birnin Copenhagen, kuma sakamakon ya bai wa Portugal damar samun maki uku. Kuma wannan ne karon farko da Portugal ta buga wasa tun bayan da Ronaldo mai shekara 41, wanda shi ne mafi zura kwallaye a tarihin kwallon kafar kasashe, ya bar sansanin kasar, bayan an ajiye shi a benci a wasan da suka yi da Norway. Bayan nasarar da suka samu a Denmark, kociyan tawagar ta Portugal, Jorge Jesus, mai shekaru 72 ya ce: "Akwai ‘yan wasa masu matsayi na musamman. Wannan abu ne a fili. Ya ci gaba da cewa "Amma zan sake fada - ka'idojin iri daya ne ga kowa. Wannan ita ce hanyar da na bi a duk tsawon aikina na horarwa, kuma zan ci gaba da bin ta." Sai dai a daren ranar da kociyan ya yi wannan maganar 'yar uwar Ronaldo, Elma Abeiro, ta rubuta a shafukan sada zumunta tun da farko cewa: "Cin amana abinci ne da aka fi jin dadinsa idan aka ci shi a hankali.’ Duk wanda yake bibiyar wasannin kwallon kafa ya san da cewa an shafe shekaru ana ganin kamar ba za a iya cire Ronaldo daga cikin tawagar ba bayan da ya ci wa Portugal kwallo 146 a wasanni 234. Sai dai a shekarun baya da kokarinsa ya ragu, an fara cece-kuce cewa watakila dan wasan Al-Nassr, wanda ya ci kwallo 979 jimilla a rayuwarsa ta kwallon kafa, yana hana tawagar yin abin da ya dace. ”Idan Na Yi Laifi A Hukunta Ni” - Ronaldo Cristiano Ronaldo ya ce bai yi ritaya daga buga wa tawagar Portugal wasanni ba, amma ya amince cewa ya kamata a hukunta shi saboda barin sansanin da suke sauka ba tare da izini ba. Kyaftin din mai shekara 41 ya bar sansanin Portugal bayan da ya kasance a benci ba tare da an yi amfani da shi ba a wasan da suka yi da Norway, sannan ya gano cewa ba zai fara karawa da Denmark ba a gasar Nations League. Ronaldo mai buga wasa a Al-Nassr, ya ci kwallo 146 a wasa 234 da ya buga wa Portugal, tare da taimaka wa kasar wajen lashe Euro 2016 da gasar Nations League sau biyu a tarihi. A cikin wata doguwar sanarwa, tsohon dan wasan Real Madrid da Manchester United da Jubentus ya ce ya kamata a dora masa alhakin abin da ya aikata na fita daga sansanin yanwasan kasar. “Hukumar kwallon kafa ta Portugal dole ne ta tantance sakamakon abin da na aikata kuma ta hukunta ni saboda abin da na aikata. Na yi imanin cewa bai kamata a rage min wani hukuncin da ya kamace ni ba,” in ji Ronaldo. Ya kara da cewa “Na riga na nemi afuwa, amma na san cewa irin wannan abu yana tattare da sakamako.” Kociyan Portugal, Jorge Jesus, ya sanar a ranar Lahadin da ta gabata cewa har yanzu kofar a bude take ga Ronaldo, domin ya ci gaba da buga wa tawagar wasanni. Ronaldo ya ce muddin yana cikin koshin lafiya, yana kuma buga wa kungiyarsa wasanni da zura kwallaye, yana son ya ci gaba da buga wa kasar wasa. Da Gaske Portugal Ta Fi Kyau Ba Tare Da Ronaldo Ba? Tabbas Ronaldo ya kasance fitaccen dan wasan Portugal gaba daya, inda ya taimaka wa kasar ta lashe Euro 2016 - kuma yana cikin jerin manyan ‘yan wasan kwallon kafa da aka taba gani a tarihi. Ya karya tarihin wanda ya fi zura kwallaye a matakin kasa shekaru da suka wuce a Portugal, kuma bai taba daina zura kwallaye yadda ya kamata ba. Ronaldo ya lashe kyautar Ballon d'Or sau biyar shi ne wanda ya fi zura kwallaye a tarihin gasar European Championship - kuma shi ne dan wasa kadai da ya ci kwallaye a gasar kofin duniya guda shida. Sai dai a cikin ‘yan shekarun da suka gabata, an shafe lokaci ana ta muhawara kan ko yana hana ci gaban kwazon Portugal. A zahiri, wannan tambaya ce da ake ta yi kusan shekara biyar da suka gabat. A Kofin Duniya na 2022, Fernando Santos ya nuna karfin hali wajen ajiye shi a benci a wasannin zagayen karshe, amma a wannan bazarar ya buga wasanni da yawa karkashin kociya, Martinez. A cikin shekaru biyar da suka gabata, Ronaldo ya rasa wasanni biyu kacal na neman gurbin shiga Kofin Duniya ko Euro, kuma duka biyun saboda dakatarwa ce, inda Portugal ta samu manyan nasarorin da ta taba samu a tarihinta ta doke Ludembourg da ci 9-0 da Armenia da ci 9-1. Tun daga shekarar 2017, kaso na nasarar Portugal ba tare da Ronaldo ya dan fi yawa kashi 64 idan aka kwatanta da 63% - kuma tana zura kwallaye 2.7 a kowane wasa ba tare da shi ba, idan aka kwatanta da 2.1 tare da shi a cikin fili.