Babban Kwamatin Ayyuka Na Jam’iyyar PDP Na kasa Ya Gana Da ‘Yan Takarar Gwamna Na Jam’iyyar

Kwamitin ayyuka na kasa na jam’iyyar PDP ya gana da ‘yan takarar gwamna na jam’iyyar su 36 da ke kasar nan.

Taron dai yana samun halartar daukacin ‘yan takarar gwamna na jam’iyyar PDP in ban da gwamnan jihar Oyo, Seyi Makinde da ke hutu a kasar waje.

• PDP Ta Shiga Fargaba Bayan Wike Ya Yi Ganawar Sirri Da Tinubu
• Ba Ku Da Dalilin Ci Gaba Da Yajin Aiki – Badaru GA ASUU

Sai dai Gwamna Bala Mohammed na jihar Bauchi shi ma ya aike da sakon ban hakuri.

Taron na sirri ne da yake da nasaba da zaman tattaunawa tsakanin shugabannin jam’iyyar na kasa da ‘yan takarar jam’iyyar gabanin zaben 2023.

Taron dai na zuwa ne a daidai lokacin da ake kira ga shugaban Jam’iyyar na kasa Dokta Iyorchia Ayu da ya sauka daga shugabanci kamar yadda, Nyesom Wike, ya gindaya sharuddan warware takaddamar zaben gwamnan jihar Delta, Ifeanyi Okowa, a matsayin dan takarar mataimakin shugaban kasa na jam’iyyar.