Cote d’Iboire Ta Amince Da Kafa Bankin Makamashi Na Afirka

Gwamnatin Cote d’Iboire ta amince da daftarin dokar kafa bankin makamashi na Afirka, watau BAE, kamar yadda mai magana da yawun gwamnatin kasar, Amadou Coulibaly ya sanar a jiya Asabar bayan wani taron majalisar ministocin kasar.

Coulibaly ya kuma shaida wa manema labarai cewa, yarjejeniyar kafa bankin wacce aka sanya wa hannu a shekarar 2024, ta tanadi Dalar Amurka biliyan 5 a matsayin babban jari na farko da za a ware musamman domin samar da kudin ayyukan makamashi da ababen more rayuwa a fadin Afirka.

• Dan Gidan Ancelloti Ya Zama Sabon Kocin Botafago FC
• 2027: Shugabannin Hamayya Sun Bazama Neman Goyon Baya A Yankunansu

Ya kara da cewa, amincewa da daftarin dokar ta nuna wani muhimmin mataki na tabbatar da dorewar samar da kudaden makamashi da kuma ikon mallakar makamashin a nahiyar.

Ana sa ran Cote d’Iboire za ta ci gajiyar tallafin da bankin makamashin na BAE zai bayar wajen aiwatar da dabarunta na cikin gida a kan sauyin makamashi da samun wadatarsa mai dorewa.

An fara batun kirkiro da bankin BAE ne tun a shekarar 2022 a karkashin kungiyar masu samar da man fetur ta Afirka, tare da hadin gwiwar bankin bunkasa fitar da kayayyaki da shigo da su na Afirka.