Da Dumi-dumi: Wani Abun Fashewa Ya Fashe Ya Kashe Mutane 4 A Sokoto

Akalla mutane hudu ne aka tabbatar da mutuwarsu yayin da wasu uku suka samu munanan raunuka sakamakon fashewar wani abu a shagon walda a karamar hukumar Isa ta jihar Sokoto a yammacin Lahadi.

Wani mazaunin unguwar, wanda ya bayyana wa wakilinmu afkuwar lamarin, ya ce: “Lokacin da na ji karar fashewar wani abu mai karfi, abin da ya fado min a rai shi ne ‘yan bindiga ne suka kawo farmaki.

• Ministan Sufuri Ya Nada Sabon Manajan Gudanarwa Na FAAN, Yayin Da Wa’adin Yadudu Ya Kare

“Amma lokacin da na ga mutane suna gudu zuwa shagon waldar inda lamarin ya faru sai hankali na ya kwanta, cewa ba ‘yan bindiga ba ne.

“Da na bincika, sai na samu labarin cewa, wani abun fashewa ne ya fashe a shagon mai walda, kuma an rasa rayuka, wasu da dama sun jikkata.”

Kakakin rundunar ‘yan sandan jihar Sokoto, DSP Sanusi Abubakar, da aka tuntube shi, ya tabbatar da fashewar wacce ta afku a yammacin ranar Lahadi.

DSP Sanusi Abubakar ya tabbatar da mutuwar mutum Hudu sakamakon afkuwar lamarin.