Wasu gungun ‘yan bindiga Sun Kashe Wani Dan sanda tare da jikkata wasu mutum uku a yankin Ikorodu da ke jihar Legas.
Wakilinmu ya labarto a ranar Litinin cewa makasan sun yi artabu da jami’an ‘yansanda ne lokacin da suke kan aikinsu na sintiri lamarin da ya janyo musayar wuta a tsakaninsu a ranar Juma’ar da ta gabata.
Kazalika an labarto cewa makasan sun kuma arci na kare da bindigar dan sandan da suka kashe.
Kodayake zuwa lokacin aiko da wannan rahoton hukumomin ‘yansanda ba su tabbatar da faruwar lamarin ba zuwa aiko da wannan rahoton, an nakalto cewa ‘yansandan caji ofis din Imota da suke aiki a Ikorodu ne lamarin ya shafa a lokacin da suke sintiri a daidai mashigar Emuren da ke kan hanyar Irokin.
Ganau sun shaida wa ‘yan jarida cewa ‘yan bindigan sun kasance ‘yan daba ne da suke biyayya ga wani fitaccen mutum sune ake zargi da kai wa tawagar ‘yansandan harin.
