Tsohon Gwamnan Jihar Sakkwato, Sanata Aminu Waziri Tambuwal ya bayyana tsananin halin ƙuncin rayuwa da al’ummar ƙasa ke fuskanta a sakamakon sake zaɓen jam’iyyar APC a 2023.
Tambuwal wanda ke wakiltar Sakkwato ta Kudu a Majalisar Dattawa ya bayyana hakan ne a yau Lahadi a wajen taron masu ruwa da tsaki na jam’iyyar PDP a Sakkwato.
- Gwamnan Sakkwato Ya Kafa Kwamitin Da Zai Binciki Tambuwal
- Kotun Daukaka Kara Ta Tabbatar Da Zaben Tambuwal Da Wamakko A Matsayin Sanatoci
Ya ce; “A lokacin yekuwar neman zabe a 2023, mun gargadi ‘yan Nijeriya kan kada su yi kuskuren sake zaben APC saman mulki domin ba su da wani abin kwarai da za su aiwatar masu.”
“Mun bayyanawa jama’a cewar APC ba ta shiryawa mulkin ƙasar nan ba. Abin da suke bukata kawai shi ne su karɓi mulki su shiga ofis. To yanzu sun karbi mulki kuma suna cikin ofis amma ba su san abin da za su yi wa al’umma ba, ga rayuwa ta yi wa mafi yawan ƴan Nijeriya tsanani saboda gazawar su.” Ya bayyana.
Tambuwal wanda shi ne shugaban masu neman a zaɓi Atiku Abubakar, ɗan takarar Shugabancin ƙasa a zaɓen 2023, ya buƙaci abokan adawa da su haɗa hannu da ƙarfe domin tabbatar da faɗuwar APC a zaɓe na gaba.
“Hakkin mu ne mu tabbatar APC ta fadi kasa warwas a dukkanin matakan gwamnati.”
Tsohon Gwamnan ya yabawa shugabannin jam’iyyar kan ƙoƙarin da suke yi na riƙe jam’iyyar da manbobin.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
