Gwamnan Jihar Kano, Dr. Abdullahi Umar Ganduje, ya ce doka za ta yi aiki kan dan Chanan da ya kashe Ummukhulthum Sani Buhari.
Gwamnan ya bayyana hakan ne yayin wani jawabi a fadar gwamnatin jihar inda ya ce “A zub da jini, dole maganar shari’ah ta shigo ciki” kuma sai doka ta yi aikinta.
Ya ce tuni jami’an ‘yansanda suka cafke mutumin da ake zargi, Mista Geng Quanrong, bayan mutane sun damke shi a gidansu marigayiyar a ranar Juma’a.
Bayanai sun ce lamarin ya faru ne a ranar Juma’a da dare, inda Geng Quanrong dan shekara 47 ya kutsa kai gidansu Ummita a unguwar Kabuga cikin karamar hukumar Gwale.
Rundunar ‘yan sandan jihar Kano ta ce tana ci gaba da gudanar da bincike, inda ta mai da batun zuwa babban sashen binciken manyan laifuka a bangaren kisan kai. BBC Hausa.
