DSS Ta Mamaye CBN, Ta Kwace Ragamar Ofishin Emefiele

Jami’an hukumar tsaro ta farin kaya DSS sun karbe ragamar ofishin gwamnan babban bankin Nijeriya CBN, Godwin Emefiele da ke hedikwatar babban bankin kasar.

Godwin dai ya kasance yana takun saka da hukumar tsaro ta farin kaya DSS akan zarginsa da bada tallafi kan daukar nauyin ta’addanci.

• CBN: Dokar Takaita Cire Tsabar Kudi A Asusun Bankuna Ta Fara Aiki

A baya dai hukumar DSS ta nemi umurnin kotu ta bata damar kama Emefiele wanda ya fita kasar waje hutun shekara.

Sai dai a watan Disambar 2022 babbar kotun birnin tarayya ta haramtawa hukumar sirrin kama, gayyata, ko tsare Emefiele.

Hukumar DSS ta kai samamen ne a hedikwatar CBN a ranar Litinin da rana a motoci 20 cike da jami’an tsaronta.

Jami’an sun kuma hana duk ma’aikatan bankin shiga ofishin Mista Emefiele.