Daya daga cikin abubuwan da nake tunani a kansu game da kasar Sin daga lokacin da na sa kafa a kasar shi ne, mece ce makomar masana’antu na tsohon yayi a kasar bisa sauyin zamani, shin ana rufe su ne ko ana mayar da su wasu abubuwa na daban? Dalilin wannan tunani shi ne yadda kasar ta rungumi zamanantarwa gadan-gadan a dukkan fannoni kuma a matakin koli. Ni dai a bisa fahimtar da na yi wa Sinawa, mutane ne da suka san darajar alkinta kayayyakinsu, don haka na san zai yi wahala a ce ana rufe wadannan tsoffin masana’antun saboda gibin da za su iya haifarwa na rashin aiki da kuma tattalin arziki. To amma kuma, me ake yi da su?
Ashe wata farar dabara ire-iren masana’antun suka runguma ta yadda suke shigar da zamani cikin ayyukansu tare da daga matsayinsu sakamakon tsare-tsaren da gwamnatin kasar ta samar musu. A cewar wasu bayanai daga ma’aikatar masana’antu da fasahar sadarwa ta kasar Sin (MIIT), akwai masana’antu na karamin mataki da suke aiki da fasahohin zamani fiye da 30,000, da wadanda suke kan mataki mai zurfi guda 1,200 kana da wadanda suka kai matakin koli na gwanancewa 230 a kasar Sin.
- ‘Yan Ta’adda Na Amfani Da Sojoji Da ‘Yan Siyasa Wajen Samun Bayanan Sirri – Zulum
- Za A Gudanar Da Baje Kolin Tattalin Arziki Da Cinikayya Tsakanin Sin Da Kasashen Afirka Karo Na 4 A Birnin Changsha Dake Lardin Hunan
Wadanda suke kan matakin na koli sun kasance a sassa daban-daban na lardunan kasar 31, da yankuna masu cin gashin kansu da manyan birane, sannan su ne suke da kaso 80 cikin dari na adadin kamfanonin da ke sarrafa kayayyaki wadanda aka shigar da su sassan ayyuka kusan 2,000, ciki har da na gwajin aiki da fasahohin zamani, da zane-zanen kayayyaki a zamanance da kuma na matakin sarrafa kayayyaki.
Sakamakon tafiya da zamani, an samu raguwar matakan sarrafa kaya a ire-iren wadannan masana’antun da a kalla kashi 28.4 cikin dari, inda sauri da yawan ayyukan sarrafa kaya suka karu da kashi 22.3 cikin dari, kana aka samu raguwar lalacewar aiki da kaso 50.2, sannan bangaren fitar da hayaki mai gurbata muhalli ya ragu da kashi 20.4 cikin dari.
Misali daga wani kamfanin sarrafa karafa na HBIS Group Ltd wanda ya rungumi aiki da fasahar zamani hade da tsarinsa na tsohon yayi kamar yadda jami’in yada labarai na kamfanin, Li Xiaogang ya bayyana, a halin yanzu cikin mintuna 29 da dakika 7 kacal suke kera na’urar masarrafin karfe, inda aka samu raguwar lokacin da ake aikin da kashi 10 cikin dari, kana hayakin da ake fitarwa ya ragu da kashi 20 cikin dari.
A bangaren masaku ma, masakar Zhejiang Yingfeng ta samu bunkasar ayyukanta musamman wajen rage yawan abubuwan da ba a bukata domin fitar da kayan da ake sarrafawa da tsafta, bayan ta rungumi amfani da fasahar zamani. Haka nan bangaren rina kaya ya samu ci gaba da kusan kashi 80 zuwa 95 cikin dari.
Bangaren aikin gona shi ma yana samun habaka bisa amfani da fasahohin zamani wajen ayyukan noma, da kula da gonaki, da sayar da amfanin gona da sauransu. A garin Zhangzhuang dake gundumar Shangshui ta birnin Zhoukou dake lardin Henan na tsakiyar kasar Sin, ana iya ganin yadda ake amfani da na’urori da fasahohin zamani a ayyukan gona a bangaren zuba taki da ban-ruwa, da taraktocin noma da jirage marasa matuka na shuka tsirrai. Kana manoma sun samu sauki sosai waje kula da gonaki ta amfani da manhajojin fasahar sadarwa.
Sashen gudanar da kasuwanci shi ma ba a bar shi a baya ba, inda a shekarar 2024, aka samu cinikin kaya ta manhajar sayar da kayayyaki ta zamani na kimanin yuan biliyan 23.5 a gundumar Ganyu ta birnin Lianyungang dake lardin Jiangsu na gabashin kasar Sin.
Wadannan tsoffin masana’antun dai na ci gaba da samun bunkasa musamman wajen amfani da makamashi mara gurbata muhalli da fasahar sadarwar mai karfin 5G da kuma rungumar aiki da kirkirarriyar basira domin samun habaka daidai da juyin zamani. (Abdulrazaq Yahuza Jere)
