Gogaggen Dan Jarida Enahoro Ya Kwanta Dama Yana Da Shekara 88

Fitaccen dan jaridan nan kuma mawallafi, Peter Enahoro, da aka fi sani da Peter Pan, ya kwanta dama.

Enahoro ya rasu ne a kasar Birtaniya bayan fama da wata cutar da ba a bayyanata ba, ya kuma bar duniya ne yana da shekara 88 a duniya.

• APC Ta Kori Dan Takarar Gwamna Da Zababben Sanata A Jihar Taraba
• An Samu Gobara 258 Cikin Wata 3 A Jihar Kano

Wata fitacciyar ‘yar jarida a Nijeriya, Misis Bunmi Sofola, ce ta sanar da mutuwar marubucin a wata sanarwar da ta fitar cikin jimami a ranar Litinin, ta ce, Ehanoro ya mutu ne a ranar Litinin 24 ga watan Afrilu na shekarar 2023.

“Ina bakin cikin sanar da rasuwar kwararren madubin dan jaridanmu, Peter Enahoro da aka fi sani da ‘Peter Pan’ a kasar Landan yana da shekara 88 a duniya.”

“An misalta Enahoro a matsayin wanda ake tunanin shi ne dan jarida a Afrika da ya fi shahara a duniya,” Sofola ta shaida.

Ehanoro yana cikin tsoffin ‘yan jarida a Nijeriya kuma ya zama Editan jaridan Daily Times tun yana karamin shekaru.

Marigayin ya halarci Kwalejin Gwamnati a Ughelli da yanzu take jihar Delta, kuma ya zauna tare da fitaccen Farfesan Ingilishi na farko a Afrika, JP Clark.

Ya kasance Editan da ke bada gudunmawa a gidan rediyon Deutsche Welle a Cologne da ke Jamani a tsakanin 1966 zuwa 1976, Kuma Editan Afrika na National Zeitung, a Basel ta kasar Switzerland, kuma ha zama daraktan editoci na mujallar New African magazine a London a shekarar 1978.