Gwamna Lawal Ya Amince Da Ƙarin Albashin Wata Ɗaya Ga Ma’aikatan Zamfara

Gwamnan Jihar Zamfara, Dauda Lawal ya amince da biyan ƙarin albashin wata ɗaya ga ma’aikatan gwamnatin Jihar.

Shugaban ma’aikata na jihar Zamfara ne ya sanar da hakan a wata takardar sanarwa da aka bayar a ranar 28 ga watan Disamba 2024.

• Wata Gidauniyar Kasar Sin Ta Mika Ma’ajiyar Ruwa Ga Al’ummar Wani Kauyen Habasha
• Gombe Ta Kafa Tarihi Na Amincewa Da Dokar Kare Masu Bukata Ta Musamman

Albashin wata na 13 shi ne irinsa na biyu a tarihin jihar Zamfara, inda gwamnatin Lawal ta biya na farko a watan Disambar bara.

Ma’aikatan gwamnatin jihar Zamfara da suka haɗa da waɗanda suka yi ritaya, za su samu alawus na kashi talatin bisa ɗari na albashin su a matsayin garaɓasar ƙarin albashin guda, wanda ya zama albashin 13.

Wannan shiri ya nuna irin yadda aka aminta da ƙwazon ma’aikatan Zamfara ta hanyar ba su tallafin kuɗi a lokacin hutun ƙarshen shekara.

Biyan albashin na watan 13 na ɗaya daga cikin dabaru da dama na ƙarfafa wa ma’aikata gwiwa da bunƙasar tattalin arziki a Jihar Zamfara.

Domin cika alƙawuran da ta ɗauka, gwamnati ta cika sama da Naira biliyan 10 na kuɗaɗen alawus-alawus da ake binta a cikin shekaru 11 da suka gabata, ta kuma amince da mafi ƙarancin albashi na Naira 70,000, tare da tabbatar da biyan albashin ma’aikata kan lokaci.