Gwamnan Zamfara Zai Binciki Badakalar Miliyan 774 A Hukumar Alhazai Ta Jihar

Gwamnan Jihar Zamfara, Dauda Lawal ya nemi a bankado badakalar Naira miliyan 774 na mahajjata da suka yi batan dabo a shekaru uku da suka wuce.

Shugaban hukumar alhazai na jihar, Alhaji Musa Mallaha ne ya bayyana hakan a lokacin da yake tattaunawa da manema labarai a hukumar da ke Gusau.

• Muna Alfahari Da Dangote  – Tinubu
• Yadda Aka Yi Walimar Saukar Alkur’ani Ta ‘Yar Abba El-Mustapha

Shugaban ya bayyana cewa, hukumar ta gano Naira miliyan 774 da ba a mayar wa maniyyata 504 da ke son zuwa aikin Hajji ba a jihar a 2019.

“Haka ne na shaida wa gwamna Dauda wannan matsalar ya kuma ba ni umarni da cewa mu bincika tsakanin da Allah don gano inda kudin suka makale don daukar matakin na gaba.

Haka kazalika shugaban hukumar Musa Mallaha ya gabatar da nadin mukamai ga kwamishinoni biyar na dindindin da kuma mambobi 18 na wucin gadi a hukumar a madadin Gwamna Dauda Lawal.