Gwamnatin Jihar Katsina ce jiha ta farko da za ta fara aiwatar da asusun ajiyar kudi na bai daya (TSA).
Kwamishinan yada labarai da al’adu, Dakta Bala Salisu-Zango, ne ya bayyana haka.
- Gwamnatin Katsina Ta Haramta Amfani Da Babur Da Dare A Kananan Hukumomi 19 Na Jihar
- Gwamnatin Katsina Za Ta Horar Da Matasa Domin Taimaka Wa Jami’an Tsaro
Kwamishinan ya ce aiwatar da shirin na TSA zai kawo dukkan kudaden gwamnati da ke cikin asusun ajiyar banki cikin ingantacciyar kula da gudanar da baitulmalin gwamnati wuri guda.
“An aiwatar da shi ne domin a tafiyar da kudaden gwamnati cikin gaskiya da rikon amana.
“TSA za ta sauƙaƙe gudanar da ingantaccen tsarin kula da kuɗin gwamnati, matsayin banki da tsabar kuɗi, tabbatar da samun kuɗi, da haɓaka ingantaccen aiki.
“Idan aka hada asusun gwamnati a bangare daya, gwamnati za ta toshe hanyoyin zirarewar kudade, sannan kuma gwamnati za ta iya cika alkawuran da ta yi wa jama’a a lokacin yakin neman zabe,” inji shi.
Gwamna Dikko Radda a ranar 3 ga watan Yuli, ya umurci ma’aikatu da ma’aikatu da hukumomin gwamnatin jihar Katsina da su fara amfani da tsarin TSA na duk wata da mu’amalar da suke yi.
Gwamnan ya ba da wannan umarni ne a wata takarda mai dauke da kwanan watan Yuli 3, 2023 mai take: “Treasury Single Account Direction Notice 2023,” wadda shi da kansa ya sanya wa hannu.
Ya kuma umurci Akanta Janar na jiha da ya tsara tsarin da ma’aikatu da hukumomi za su gudanar da harkokinsu na banki/tsabar kudi a karkashin TSA.
TSA tsari ne da ake amfani da ita a ƙasashe da yawa a duk faɗin duniya.
Gwamnatin tarayyar Nijeriya ce ta gabatar da shi a shekarar 2012 a karkashin gwamnatin Jonathan kuma gwamnatin Buhari ta aiwatar da shi ne domin a hade duk wasu kudaden dukkan hukumomin gwamnati zuwa asusu daya a babban bankin Nijeriya.
