Hadaddiyar sanarwa da Sin da Amurka suka fitar a jiya Litinin ta samu karbuwa sosai daga al’ummun duniya. Sanarwar ta ce, Amurka ta soke karin harajin kwastam na kashi 91% da ta kakabawa kasar Sin, yayin da a nata bangaren Sin ta soke harajin kwastam na kashi 91% da ta mayar da martani ga Amurka. Ban da wannan kuma, Amurka ta jinkirta harajin kwastam na yin-min-na-rama na kashi 24% da ta kakabawa Sin, yayin da Sin kuwa ta soke harajin ramuwa na kashi 24% da ta dorawa Amurka, matakin da ya karawa duniya kwarin gwiwa, tare da bunkasa muhimman kasuwannin hannun jari.
An yi wannan shawarwari ne bisa rokon Amurka, kuma ganawa ce ta farko da bangarorin biyu suka yi fuska da fuska bayan Sin ta mai da tsattsauran martani kan matakin kakaba mata karin harajin kwastam da Amurka ta yi tun daga watan Afrilun bana. A shawarwarin da aka gudanar cikin raneku 2, ba kawai matsaya daya bisa shawarwari masu yakini kadai aka yi ba, da rage harajin kwastam ga juna, har ma an amince da kafa tsarin tattaunawa tsakanin sassan biyu game da batutuwan tattalin arziki da ciniki, da kara tuntubar juna kan batutuwan da suke jawo hankalinsu.
Farfesa a kwalejin koyar da ilmin huldar diplomasiyya ta Sin Li Haidong ya ce, cimma wannan nasara tsakanin sassan biyu ba abu ne mai sauki ba, amma nasarar da aka samu ta shaida fahimtarsu ga muhimmancin dankon huldar tattalin arzikinsu da ba za a iya katsewa ba, wanda ya aza tubali na shawarwari da hadin gwiwarsu a dukkanin bangarori.
Wajibi ne Sin da Amurka su kara kokari bayan ci gaban da suka cimma a shawarwarin, musamman ma Amurka wadda ta tayar da takaddamar cinikin, don rungumar hadin gwiwa tsakaninta da Sin. (Amina Xu)
