Hatsarin Mota Ya Halaka Mutum 37 Da Jikkata Wasu Da Dama A Hanyar Damaturu Zuwa Maiduguri

An tabbatar da mutuwar mutane 37 a wani hatsarin mota da ya afku a kan babbar hanyar Damaturu zuwa Maiduguri da wasu takwas kuma sun samu raunuka.

Babban jami’in hukumar kiyaye haddura ta kasa (FRSC), shiyya ta 12 da ta kunshi jihohin Bauchi, Borno da Yobe, ACM Rotimi Adeleye, ne ya tabbatar wa manema labarai afkuwar hatsarin a ranar Talata.

• Fasinjoji 14 Sun Kone Kurmus A Hatsarin Mota A Kano – FRSC 

Adeleye ya ce hatsarin ya afku ne da misalin karfe 10:00 na safiyar ranar Talata a kan hanyar Maiduguri zuwa Damaturu kusa da wani kauye mai suna Jakana wanda ya hada da motoci uku – Homa bas guda biyu da kuma Golf salun guda 1.

Ya bayyana cewa motocin bas guda biyun ne suka yi karo da juna inda nan take suka kama da wuta, mutane 37 suka mutu nan take saboda konewar, ba a iya gane mutanan.

Hukumar FRSC ta tura jami’anta domin aikin ceto inda suka tuntubi kwamishinan ‘yan sandan jihar Borno domin samun umarnin kotu na binne wadanda suka rasu.