Ighalo Yana Son Osimhen Ya Koma Manchester United

Odion Ighalo ya bukaci Victor Osimhen da ya koma Manchester United tare da kulla alaka mai karfi da Marcus Rashford.

Dan wasan gaba na Napoli Osimhen ya zama daya daga cikin manyan ‘yan wasan da suke taka leda a Turai yayin da ya yi fice a filin wasa na kungiyar Napoli (Diego Armando Maradona).

• Osimhen Ya Lashe Kyautar ‘Globe Soccer’ Ta Duniya

Kwallayen da dan wasan na Nijeriya ya zura a raga, sun taimaka wa Napoli wajen tsayawa a gaba a gasar Seria A. Ighalo ya yi imanin cewa, dan wasan a yanzu ya kai matsayin da ya dace ya kara kaimi zuwa wata babbar kungiya.

Dan wasan gaban Al-Hilal, mai shekara 33, wanda ya shafe shekara daya a Manchester United a matsayin aro, ya yi imanin cewa Osimhen zai yi matukar dacewa a tawagar Erik ten Hag.