Jam’iyyar ADC Reshen Jihar Kaduna Ta Jinjinawa Uba Sani Kan Rage Kudin Manyan Makarantu A Jihar 

Shugaban jami’yyar ADC reshen jihar Kaduna Hon. Ahmed Tijjani Mustapha, ya yabawa gwamnan jihar Sanata Uba Sani kan hangen nesan da ya yi na rage kudin manyan makarantu mallakar gwamnatin jihar. 

Yabon na kunshe ne a cikin sanarwar da ya rabawa manema labarai a jihar, inda ya yi nuni da cewa, rage kudin karatun, gwamnan ya yi ne duba da kokaken iyayen dalibai sukai ta yi a baya kan karin kudin makarantun.

• Gwamna Uba Sani Ya Rage Kudin Manyan Makarantun Jihar Kaduna

Kazalika, shugaban ya ce wannan rage kudin na makarantun, alamu ne Uba ya fara cika alkawuran da ya daukarwa al’ummar jihar lokacin yakin neman zabensa.

Mustapha ya kuma yi kira ga mahukunta a kasar nan, da su yi koyi da wannan hangen nesan na gwamna Uba, mussaman don ‘ya’yan talakawa su samu damar zuwa makaranta.