Jirgin Yakin NAF Ya Kashe ‘Yan Ta’adda, Ya Lalata Maboyarsu A Dajin Katsina

Rundunar Sojin Sama da rundunar sojin kasa na sojojin Nijeriya, a ranar 30 ga watan Junairu, 2024, sun kashe ‘yan ta’adda da dama tare da lalata maboyarsu a jihar Katsina.

Daraktan hulda da jama’a da yada labarai (DOPRI) na rundunar sojin sama, Air Vice Marshal Edward Gabkwet, a cikin wata sanarwa da ya fitar, ya ce hadin gwiwar ta yi sanadin kawar da ‘yan ta’adda da dama tare da lalata maboyarsu da ke kan tsaunin Tora a Karamar Hukumar Safana ta Jihar Katsina.

Ya ce, jirgin rundunar sojin saman (NAF) ne ya fara kai wa maboyar hari, inda daga nan sojojin kasa suka yi nasarar kashe sauran ‘yan ta’addan da suka tsere.