Kasar Sin: An Yi Tafiye-tafiye Sama Da Miliyan 300 A Lokacin Hutun Bikin Bazara 

Ma’aikatar al’adu da yawon bude ido ta kasar Sin ta bayyana cewa, a yayin lokacin hutun bikin Bazara na bana, an yi balaguro kusan miliyan 308 a cikin gida a kasar Sin, wanda ya karu da kashi 23.1 bisa dari kan na bara. 

Alkaluman da ma’aikatar ta fitar sun nuna cewa, yawan kudaden shiga da aka samu a fannin yawon bude ido na cikin gida a lokacin hutun na tsawon mako guda, ya kai kudin Sin RMB Yuan biliyan 375.8, kwatankwacin dalar Amurka biliyan 55.52, wanda ya karu da kashi 30 cikin dari kan na bara.

• Alex Ampaabeng：Matakan Yaki Da COVID-19 Na Sin Za Su Taimaka Wajen Dawo Da Tsarin Samar Da Hajoji A Duniya

Jimillar wuraren shakatawa 10,739 dake mataki na A, dake zama kashi 73.5 cikin dari na jimillar wuraren bude ido na kasar, duk an bude su kamar yadda aka saba a lokacin hutun.

Alkaluman kudade na haraji sun nuna a jiya Juma’a cewa, yawan kudaden shiga da aka samu a bangaren sayarwa a sassan da ke da alaka a lokacin hutun bikin Bazara na tsawon mako guda, ya karu da kashi 12.2 bisa 100 idan aka kwatanta da na bara.

Haka kuma yawan kudaden shiga a fannin sayarwa, ya samu matsakaicin karuwar kashi 12.4 cikin 100 a cikin lokacin, idan aka kwatanta da lokacin hutun bikin Bazara na shekarar 2019, gabanin barkewar annobar cutar COVID-19, kamar yadda bayanan harajin da hukumar kula da harajin kasar ta fitar.(Ibrahim)