Al’ummar unguwar Fagge Quarters da ke karamar hukumar Tarauni a Jihar Kano sun gamu da wani lamari mai ban mamaki yayin da rigar angwanci tayi batan- dabo sauran sa’o’i kasa da 24 a daura aure sannan kuma aka sace kudin sadaki ana tsaka da daurin aure.
Angon da ya nemi a sakaya sunansa ya ce ya nemi kayan sa na angonci da ya boye a wuri mai tsaro sama ko kasa babu su.
Lamarin da ya afku a ranar Asabar din da ta gabata ya sanya ango da danginsa cikin rudani sakamakon yadda angon ke aiki tukuru don tara kudin sayen kayan da aka sace.
“Yanzu me zan saka don wannan bikin da sau daya yake a rayuwa? Inji angon.
Sai dai tuni angon ya kai kara ga jami’an ‘yansanda dake garin Tarauni, inda suka fara bincike a kai.
Mafi takaici kuma, an sace kudin sadaki a wurin daurin auren. An samu rudani lokacin da aka gano cewa an sace kudin.
Sai da dattijai suka nuna dattakunsu a wajen bikin don kwantar da hankula inda daga bisani aka amince a shafa fatiha bisa sadaki ‘Ajalan’ ba ‘lakadan’ ba.
