Ko Ina Cikin Gwamnatin Tinubu, Zan Faɗa Wa APC Gaskiya – El-Rufai

Tsohon gwamnan Kaduna, Nasir El-Rufai, ya bayyana a yau Alhamis cewa, ko da yana cikin gwamnatin Shugaba Bola Tinubu, ra’ayinsa game da yadda ake tafiyar da mulki ba zai canza ba.

El-Rufai ya mayar da martani ne ga mai ba shugaban ƙasa shawara kan harkokin sadarwa, Daniel Bwala, wanda ya soki kalaman El-Rufai na cewa ƙasar na fuskantar “ gaggawa” a fannin mulki da ƴan adawa.

• Fashewar Tayar Jirgi A Kano: Gwamnatin Tarayya Ta Dakatar Da Kamfanin Max Air Na Tsawon Watanni Uku
• Rundunar Ƴansandan Kano Ta Kori Wani Jami’i Saboda Karɓar Na Goro

A taron da aka yi a Abuja kan ƙarfafa dimokuraɗiyya a Nijeriya, El-Rufai ya caccaki APC da yadda babu cikakken tsari a jam’iyyar, yana mai cewa, “Ban gane jam’iyyar APC ba, babu wani taron jam’iyya da aka yi cikin shekaru biyu – babu majalisar koli, babu NEC, babu komai. Babu ma wanda ke tafiyar da jam’iyyar; ba mutum ɗaya bane, babu kowa ma.”

Bayan wannan, jam’iyyar APC ta maida martani, tana zargin El-Rufai da cin amana da ƙoƙarin ɓata wa jam’iyya suna. Wannan ya sa Bwala ya tambaye shi a shafinsa na X cewa, “Da kana cikin gwamnati, da har yanzu za ka riƙe wannan matsayi?”

A martaninsa, El-Rufai ya bayyana cewa tun farko bai taba buƙatar muƙami a gwamnatin Tinubu ba, yana mai cewa, “Na riga na zama minista shekaru 22 da suka wuce, kuma na shaida wa Asiwaju tun farko cewa ba na buƙatar wani muƙami a gwamnatinsa.”

Ya ƙara da cewa, “Da har yanzu ina cikin wannan gwamnati, zan fadi gaskiya a cikin tarurruka na sirri, kuma idan ba a ɗauki mataki ba, zan yi magana a fili. Duk wanda ke shakkar haka, ya duba tarihin aikin gwamnati na tun daga 1998.”

El-Rufai ya kuma soki wasu da ya kira “’yan amshin shata” a gwamnatin Tinubu, yana mai cewa suna amfani da kuɗaɗen tsaro don kare duk wani abu da gwamnati ke yi, ko da kuwa ba abin karewa bane. Ya buƙaci Bwala da ya tuna cewa “Alkawari na farko shi ne ga Allah da ƙasa, kafin wani mutum ko hukuma.”