Babbar jami’a a hukumar kiwon lafiya ta kasar Sin Shen Haiping, ta ce a shekarun baya bayan nan koshin lafiyar yaran kasar Sin na kara inganta. Jami’ar wadda ta bayyana hakan ga wani taron manema labarai a yau, ta ce a shekarar 2024, alkaluman mace-macen jarirai a kasar ya ragu zuwa jariri hudu cikin duk jarirai 1000, yayin da na yara ‘yan kasa da shekaru biyar ya ragu zuwa yara 5.6 cikin duk yara 1,000, adadin da ya yi kasa sosai cikin jerin kasashen duniya, dake rukunin masu al’ummun dake sama-sama a matsakaicin samun kudin shiga.
Shen Haiping ta kara da cewa, idan aka nazarci wadannan alkaluma, za a ga cewa cikin sama da shekaru goma da suka gabata, a duk shekara, matsakaicin adadin mace-macen jarirai a Sin ya ragu zuwa matsayi na uku a duniya, kana adadin mace-macen yara ‘yan kasa da shekaru biyar a kasar shi ma ya ragu zuwa matsayi na hudu a duniya, musamman cikin jerin kasashe 53 dake sama-sama a matsakaicin samun kudin shigar al’ummunsu. (Mai fassara: Saminu Alhassan)
