Majalisar Dattawa za ta gudanar da zama na musamman a ranar Laraba, 24 ga Yuli, domin girmama tsohon shugaban ƙasa marigayi Muhammadu Buhari, wanda ya rasu a ranar 13 ga Yuli yana da shekaru 82.
A cikin wannan zama, majalisar za ta yi nazari kan rawar da Buhari ya taka wajen bunƙasa ƙasa da kuma irin gadon da ya bari a tarihin siyasar Nijeriya.
- An Sanya Wa Titin Shendam Sunan Marigayi Muhammadu Buhari
- Ban Tsani Buhari Ba, Ina Sukar Sa Ne Kawai Kan Matsalar Tsaro – Ortom
Wannan na zuwa ne kwanaki kaɗan bayan Majalisar Zartarwa ta Ƙasa (FEC) ta gudanar da irin wannan zama na girmamawa a ranar Alhamis da ta gabata, inda Shugaba Bola Tinubu ya yaba da salon shugabancinsa.
Marigayi Buhari, ɗan asalin Daura a Jihar Katsina, ya rasu a birnin Landan kuma an binne shi a garinsu ranar 15 ga Yuli, 2025, a wata jana’iza da manyan baki daga ciki da wajen ƙasa suka halarta. Yayi mulkin Nijeriya – daga 1983 zuwa 1985 a matsayin shugaban Soja, sannan daga 2015 zuwa 2023 a matsayin shugaban da aka zaɓa ta dimokuraɗiyya.
A wani ɓangare na zaman majalisar ranar Talata, shugaban majalisar, Sanata Godswill Akpabio, ya ƙaryata jita-jitar da ke yawo cewa an amince da ƙirƙirar sabbin jihohi, yana mai cewa har yanzu babu wani ƙudurin da ya kai matakin amincewa.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
