Malumfashi FC Ta Doke Kano Pillars A Gasar Gajiyayyu

Kungiyar kwallon kafa ta Kano Pillars tasha kashi da ci daya mai ban haushi a hannun tawagar Malumfashi, a wasan da aka fafata a jihar Katsina da yammacin yau.

Dan wasa Williams ne ya ci kwallon a minti na 29 da fara wasan wanda kuma a haka aka tashi wasan duk da irin hare-haren da Pillars din ta kai.

Karo na farko kenan da Kano Pillars tayi rashin nasara a gasar ta gajiyayyu inda a baya ta doke kungiyoyin Kebbi United da Sokoto United.

Kano Pillars wadda ta lashe gasar Premier sau huɗu a Najeriya, zata buga wasan ta na gaba da Zamfara United a ranar 16 ga wannan watan a filin wasa na Sani Abacha dake Kofar Mata kuma duk da rashin nasara a wasan yau sune na daya a cikin rukunin.