Mata A Dage Da Tsare Mutuncin Kai – Zainab Muhammad

ZAINAB MUHAMAD mai neman ilimi kuma ‘yar kasuwancin sayar da kayan kamshi na mata ‘yar asalin Garin Hadejia ta yi wa shafi Adon Gari karin haske kan yadda ta tsinci kanta a harkar kasuwaci wanda ta ce ta samu rufin asiri sosai a cikinta, sannan ta yi kira ga mata da su koyi sana’a domin su tsira da mutuncinsu, kamar yadda za ku ji a wannan hira da wakiliyarmu BILIKSU TIJJANI KASSIM.

Da fari za mu so sanin cikakken sunanki da tarihinki

Suna na Zainab Muhammad Sambo, ni cikakkiyar ‘ya Hadejia ce an haife ni a Garin Hadejia a shekara ta 1997 a Unguwar Wuriwa, na yi makaranta a Garin Hadejia

Shin Zainab matar aure ce?

A’a ni ba matar aure bace muna niyya in sha Allahu.

‘Yar kasuwa ce ko ma’aikaciya?

A a ni ba ma’aikaciya bace, ina dan taba kasuwanci haka-kadan dai wanda ba’a rasa ba.

Wanne irin kasuwanci kike yi?

Kayan kamshi nake sayarwa

Shin me kasuwancin naki ya kunsa?

Kamar turaren wuta, Humura da duk nau’ika na kayan kamshi da sauransu.

To ke kuwa me ya ja hankalinki har kika shiga wannan kasuwanci?

Saboda ni ma’abociyar san kamshi ce.

Me ye matakin karatunki?

Na gama Difiloma.

Wanne irin kalubale kika taba fuskanta a cikin sana’arki?

Kalubalan da na fuskanta akwai ranar da wata ta sani na hada mata turaren wuta amma ba ta saya ba shi ne kalubale na da na taba fuskanta, saboda abin ya bani haushi kin san dai yadda hadin turare yake da wahala ka kwana kana yi sai da na gama ba ta kara magana ba.

Zuwa yanzu wanne irin nasarori kika cimma?

Na samu nasarori da dama bikin kawayena da taron makaranta duk da sana’ ata nake yi har na tallafa wa mabukata

Wanne abu ne ya fi faranta miki rai game da sana’arki?

Alhamdu lillah idan na yi turare a ce ya yi dadi ana so wannan yana faranta min rai ina jin dadin haka sosai.

Ta wacce hanya kike bi wajen tallata sana’arki?

Ta hanyar intanet kamar whatsapp, facebook, instagram, da dai sauransu.

Dame kike so mutane su rika tunawa dake?

Ina so mutane su rika tunawa da ni a kan kamshina da kuma fara’a ta da wasa da dariya.

Ga karatu, ga kuma kila kina taya mama ayyukan gida, shin ta yaya kike samun damar gudanar da hutunki?

Kome nawa a tsare yake komai na ba shi lokacinsa.

Wace irin addu’a ce idan aka yi miki kike jin dadi?

In aka min addu’ar Allah ya jikan mahaifina ina jin dadi sosai

Wane irin goyon baya kike samu daga wajen iyaye da ‘yan uwanki?

 Alhamdu lillah ina samun goyan baya dari bisa dari a wurin iyayena da ‘yan uwana babu abin da zan ce musu sai godiya da kuma addu’ar Allah ya saka musu da alkhairi.

Kawaye fa?

Ni ban da kawaye, ‘yan uwana su ne kawayena

Me kika fi so cikin kayan sawa fa kayan kwalliya?

Ina son leshi da doguwar riga ta komai kayan kwalliya kuma ba na son na ga idona babu kwalli.

A karshe wace irin shawara za ki bawa ‘yan uwanki mata?

Shawarata ga mata ‘yan uwana su dage su nemi sana’a kuma su tsare mutumcinsu.