An sanar da bacewar mataimakin shugaban kungiyar Miyetti Allah na Kasa (MACBAN), Injiniya Munnir Atiku Lamido.
A cikin sanarwar da kakakin kungiyar na kasa, Muhammad Nuru Abdullah ya fitar, sanarwar ta ce Atiku ya bar gidansa da ke a Jihar Katsina a ranar 23 ga watan Yuni, d niyyar zuwa Jihar Kaduna, inda daga nan ba a kara jin duriyarsa ba.
- NLC Za Ta Yi Zama Kan Hana Wasu Ma’aikatan Kano Albashi
- Mutane 11 Sun Rasu, 8 Sun Jikkata A Hatsarin Mota A Edo
A cewar sanarwar, “Muna sanar da al’ummar gari da kuma hukumomin tsaro cewa, Injiniya Munnir Atiku Lamido ya bace.”
Sanarwar ta kara da cewa, an gano motarsa a tsakanin babbar hanyar Jos zuwa Jihar Kaduna daura da mararraban Jos a ajiye ciki har da wayoyinsa.
Sanarwar ta bayyana cewa, duk iya kokarin da aka yi na gano shi hakan ya ci tura.
A bisa wannan sanarwar, duk wanda ke da sashen bayanai kan inda yake, ya taimaka ya kai rahoto ga caji ofis din ‘yansanda mafi kusa ko kuma ya tuntubi kungiyar ta MACBAN.
