Mafi akasari wannan ita ce matsalar da ta addabi gidajen aure musamman a yankin Arewacin Nijeriya.
In muka duba za mu ga cewa wannan matsalar tana faruwa ne daga bangaren maigida domin kuwa tun a wurin neman auren zai baje wa amarya dukkan irin hidimar da ake yi a gidansa kama daga yadda suffar uwargida take har zuwa yadda take gudanar da ala’amuranta a cikin gida.
A lokacin da yawanci maza suke neman aure su kan dukanta da irin romon soyayya da suke samu daga wurin yarinyar da suke nema, har ta kai ga za ka ga ana kokarin raba kwanaki tsakanin uwargida da kuma yarinyar da za a auro.
Da wadannan halaye ne maza suke sayar da mutuncin uwargida a waje wanda hakan zai ba wa ita amaryar da za a auro lasisin cewa fa ashe ma ‘matar gidan ba ta da fada a gidan, mijin baya son ta ni ya fi so, ko kuma ta ji a ranta cewa ita ce ‘yar gaban goshi ‘ da ire-iren wannan tunanin ne yawanci amare suke shiga gidajen aure.
Wanda tun a waje ta gama daura damarar cewa in ta shigo ita ce ‘yar gaban goshin miji saboda haka babu sauki tsakaninta da uwargida.
Bayan aure sai ka ga amarya ta dauki tsirfa iri-iri wai ita dole sai ta chusa wa uwargida bakin ciki, uwar gidan da ta yi shekara goma da miji sai ka ga yarinya karama an auro ta ta zo tana kokarin nunawa uwargida cewa fa ta fita sanin miji.
Da yawa amare suna shiga cikin gidajen aurene da niyyar uwargida tafita ta bar musu mijin domin ita ba ta iya kula da miji ba su ne suka iya soyayya su ne suka iya kula da miji.
Uwargida tana fuskantar hali da dabi’u iri daban -daban a wurin amarya wanda hakan ya samo asali ne daga irin tadin da shi mijin ya yi wa amarya tun a wurin neman auren ta.
Wani mijin tsabar dadi soyayya zai gama zayyana duk irin zaman da suke yi da uwargida mai dadi ko mara dadi inda su kuma amaren suke riko da shi a matsayin makamin muzgunawa uwargida, tun da burin kowace amarya shi ne miji ya fi son ta, laifin uwargida kadan ake jira har da wanda ba ta yi ba a kai kara wurin miji, shi kuma dama dadi amarya ba zai bar shi ya yi bincike ba zai hau fada yana masifa, wanda hakan kan haifar da rashin jituwa a tsakani.
Ko hira ake yi sai ka ga amarya na kokarin nuna wa uwargida ai ta fi ta sanin kan miji, a dole sai ta nunawa uwargida ita ce fa yar gaban goshin miji.
Mazaje su suke da babban kaso a irin halayen da amare ke shigowa da su gidaje.
