MSS: Neman Sinawa ‘Yan Leken Asiri Da CIA Ta Yi Tamkar Wasan Ban Dariya Ne

Kwanan baya, hukumar leken asiri ta kasar Amurka wato CIA, ta gabatar da wani faifan bidiyo na Sinanci ta shafin intanet, mai kunshe da bukatar daukar ma’aikata Sinawa don gudanar da harkokin leken asiri.

Dangane da wannan batu, ma’aikatar kula da tsaron kasar Sin wato MSS, ta fidda sanarwa dake cewa wannan talla marar inganci da hukumar CIA ta gabatar, ta nuna rashin hikima a dabarar hukumar CIA, ta rura wutar canza sheka cikin kasar Sin, lamarin da ya yi kama da wani wasan barkwanci.

MSS ta kara da cewa, a tsawon lokaci CIA ta kafa tashoshin leken asiri daban daban a sassan duniya, domin leken asirin sauran kasashe game da harkokin siyasa, da tattalin arziki, da kimiyya da fasaha, da aikin soja da dai sauransu, ta yadda Amurkan za ta iya kara karfinta na mulkin kasa da kasa, yayin da take kwashe moriyar kasashen duniya. Lamarin da ya gurgunta ka’idar cudanyar kasa da kasa, ya kuma kai ga gamayyar kasashen duniya na nuna adawarsu ga CIA.

Kazalika, abun da ya faru yanzu ya nuna cewa, zargin da kasar Amurka ta yi cewar wai Sin ta tura ‘yan leken asiri zuwa Amurka ba gaskiya ba ne, kuma ko shakka babu duk wanda ke neman dakile farfadowar kasar Sin ba zai cimma nasara ba. (Mai Fassara: Maryam Yang)