Kimanin mutum 10 ne suka bata a wani jirgin kwale-kwalen da ya kife da yan kasuwar garin Jumbam na karamar hukumar Tarmuwa a jihar Yobe.
Lamarin ya faru lokacin da suke kokarin tsallaka gadar da ambaliyar ruwa ya rutsa da ita a kauyen Kaliyari, kan hanyarsu ta zuwa kasuwar Babangida a safiyar yau Asabar.
- Ambaliyar Ruwa: Gwamnatin Yobe Ta Tallafa Wa Magidanta 457 A Karamar Hukumar Jakusko
- Yadda Rugujewar Gadar Katarko Ta Katse Yobe Da Jihohin Borno Da Gombe
Wakilinmu a jihar Yobe ya tattauna da wani ganau jim-kadan da faruwar hatsarin kwale-kwalen, Mallam Ja’afar Nuhu, wanda shi ma daya ne daga cikin ‘yan kasuwar Babangida mai ci mako-mako.
Nuhu, ya bayyana cewa jirgin ya dauko mutum 22, wanda bayan kifewarsa kimanin mutum 10 sun bata, kana mutum 12 sun tsallake rijiya da baya.
“Baya ga kifewar kwale-kwalen kuma an samu gawar wani mutum daya wanda ya yi kokarin tsallaka ruwan.”
Ya kara da cewa, “Hatsarin ya afku da misalin karfe 10:00 na safiyar ranar Asabar, jim-kadan da faruwar hatsarin muka zo nan, a nan inda gadar Kaliyari ta karye. Kuma muma cikin taimakon Allah, jirginmu ya tsallakar da mu lafiya.” Cewar Mallam Ja’afar.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
