A baya bayan nan, kundin da aka amince da shi yayin cikakken zama na hudu na kwamitin kolin JKS na 20, ya tanadi tsare-tsaren musamman na fadada bude kofofin kasar ga sassan waje, da dora muhimmancin gaske ga samar da sabon yanayin hadin gwiwar cimma moriyar juna.
A halin yanzu, a hannu guda ana ganin zurfafar sabon zagayen juyin-juya-halin fasahohi, da sauyi a ci gaban masana’antu, a gabar da duniya ke bukatar bude kofa da rarraba gajiya sama da duk wani lokaci a baya. A daya hannun kuma, tsarin daukar matakan kashin kai da kariyar cinikayya na dada kamari, kuma duniya na fuskantar yanayin rashin daidaiton ci gaba da gibi a fannin jagoranci.
A wannan yanayi mai sarkakiya da duniya ke ciki, Sin ta nacewa kara fadada bude kofofinta, tana kuma ci gaba da karkata akalar nasarorinta kan turbar zamanantarwa ta Sin zuwa tsarin samar da gajiya ga ci gaban duniya na bai daya.
Shaida ta hakika ta nuna cewa, ba zai yiwu a raba tsakanin ci gaban Sin da na duniya baki daya ba, kana ba za a iya raba ci gaban duniya da na kasar Sin ba. Don haka, jigon samar da karin gudummawar Sin ga ci gaban tattalin arzikin duniya na da nasaba da babban tsarin bude kofofi daga mabanbantan sassa. (Mai fassara: Saminu Alhassan)
