Mutum 20 Sun Mutu Sakamakon Tashin Gobara Da Wata Tankar Mai A Jihar Kogi

Sama da mutane 20 ne suka kone kurmus bayan wata Tankar dakon man Fetur ta fadi Gadar Rafin Maboro da ke a yankin Ankpa, cikin karamar hukumar Ankpa a jihar Kogi.

Wani ganau ya ce, ibtila’in ya auku ne da misalin karfe 3 a jiya Laraba. Irin wannan ibtila’in shine na biyu a wannan yankin duk acikin wannan Watan.

• Wata Mota Ta Yi Karo Da Motar ‘Yansanda, 6 Sun Mutu, Motoci Biyar Sun Kone

Kwamandan hukumar kiyaye haddura ta jihar (FRSC) Stephen  Dawulung, ya tabbatar da afkuwar lamarin, sai dai ya bayyana cewa, har yanzu hukumar ba ta iya tantance adadin wadanda suka mutu ba.

Y a ce, mun tura jami’anmu gurin da lamarin ya auku don su tattara gawarwakin wadanda suka rasun, amma har yanzu, ba mu samu hakikanin adadin wadandda suka mutu a hadarin ba.

Stephen ya bayyana cewa, Tankar da wata mota kirar Bas da kuma wasu Babura uku ne hadarin ya rutsa da su.