Rundunar sojin saman Nijeriya, NAF ta kashe ‘yan bindiga da dama ciki har da na hannun damar kasurguman ‘yan bindiga Dan-Isuhu da Dogo Sule a jihar Zamfara.
Hakan na kunshe ne cikin wata sanarwa da kakakin rundunar NAF, kuma daraktan hulda da jama’a da yada labarai, Air Commodore Olusola F. Akinboyewa ya rabawa manema labarai a Abuja.
- Gobara Ta Yi Sanadiyar Asarar Miliyoyin Dukiya A Kasuwar Katako Da Ke Jos
- SSANU Ta Sake Zaɓar Shugaba Wa’adin Shekaru 4
A cewarsa “Hare-haren da aka kai ta sama, an tarwatsa wani babban taron ‘yan bindiga ne a kauyen Babban Kauye da ke karamar hukumar Tsafe a jihar Zamfara.
“Majiyoyin leken asiri sun bayyana cewa, ‘yan bindigar sun taru ne da nufin kai hare-hare kan jami’an rundunar tsaro ko kuma mazauna yankin Tsafe.
“Don haka, da samun sahihan bayanan sirri, NAF ta kaddamar da hare-hare ta sama, inda ta yi nasarar kawar da ‘yan bindiga da dama.
“Rahotanni sun tabbatar da nasarar kawar da wasu jagororin kasurguman ‘yan bindiga, inda hakan zai yi sanadin lalata muggan ayyukansu.”
