Namadi Sambo Ya Yaba Wa Gwamna Abba Yusuf Kan Bunƙasa Ɓangaren Ilimi Da Gine-Gine A Kano

Tsohon Mataimakin Shugaban Ƙasa, Namadi Sambo, ya yaba wa Gwamnan Jihar Kano, Abba Kabir Yusuf, kan ayyana dokar ta-baci a fannin ilimi a jihar.

A wata ziyara ta jaje da ya kai wa gwamnan Kano kan rasuwar Alhaji Aminu Alhassan Dantata, Sambo ya nuna gamsuwa kan irin ci gaban da ake samu a fannin gine-gine da kyautata gine-ginen gwamnati, musamman gyaran gidan gwamnatin Kano.

• Abba Ya Yi Sabbin Naɗe-naɗe A Jihar Kano
• Tinubu Ya Ƙaddamar Da Cibiyar Fasahar Da Aka Lalata Lokacin Zanga-Zanga A Kano

Namadi, Ya bayyana cewa yana bibiyar ayyukan gwamnatin Abba Yusuf. Ya kuma ya shaida irin sauye-sauyen da aka samu a zahiri.

Gwamna Yusuf ya gode wa tsohon mataimakin shugaban ƙasar, bisa ziyarar ta’aziyya da ya kai jihar tare da kalaman karfafa guiwa, yana mai jaddada ƙudirin gwamnatinsa na farfaɗo da martabar Kano ta hanyar ayyukan raya kasa.

A wani labarin makamancin wannan, Sanata Abubakar Sani Bello da wasu manyan baki sun kai ziyarar jaje ga gwamnan da al’ummar Kano dangane da rasuwar Alhaji Dantata.