Ndume Ya Gargaɗi Tinubu Kan 2027: “An Taɓa Yi Wa Jonathan Irin Wannan”

Sanata mai wakiltar Borno ta Kudu, Mohammed Ali Ndume, ya bayyana cewa bai goyi bayan yunƙurin wasu gwamnoni na jam’iyyar APC na mara wa Shugaba Bola Tinubu baya don sake tsayawa takara a 2027 ba. Ya bayyana hakan ne a shirin ‘Sunday Politics’ na Channels TV, inda ya ce yanayi bai dace da hakan ba yanzu.

Sanatan ya tuna cewa a 2015 tsohon Shugaba Goodluck Jonathan ya samu goyon bayan gwamnoni 22 na jam’iyyar PDP, amma hakan bai hana shi faɗuwa a hannun Muhammadu Buhari na APC ba. Ya ce irin wannan goyon baya daga gwamnoni ba ya tabbata da nasara.

A ranar 22 ga Mayu, 2025, gwamnoni 22 na jam’iyyar APC sun amince da Tinubu a matsayin ɗan takarar jam’iyyar don zaɓen shugaban ƙasa na 2027. Amma Ndume ya bayyana cewa bai goyi bayan wannan mataki ba saboda matsin rayuwa da rashin tsaro da ke addabar ƙasar.

Ya ce lokacin da aka fara jefa ƙuri’ar amincewa da Tinubu a wani taro a Banquet Hall na Villa, ya fice daga wajen. Ya bayyana cewa ba dalilin zuwansa taron ba ne, kuma ficewarsa ba yana nufin ya fice daga APC ba, sai dai ya ce bai dace a yi hakan ba a yanzu.

Ndume ya ce tarihi ya nuna cewa irin wannan taron mara baya ba ya nufin nasara. Ya kawo misalin Jonathan wanda duk da samun goyon bayan gwamnoni 22 a 2015, ya sha kaye. Ya ce “yan siyasa na sauya jam’iyya amma masu kaɗa ƙuri’a ba sa sauya ra’ayinsu,” yana mai bayyana cewa ba a ɗaukar darasi daga tarihi.