Ministan kula da harkokin kasashen waje, Ambasada Yusuf Tuggar ya ce, Shugaban kasa Bola Tinubu na bukatar karin yin tafiye-tafiye zuwa kasashen duniya, sannan kuma Nijeriya na da dimbin dukiya.
Ministan ya ce a halin da ake ciki ma, tafiye-tafiyen da Shugaban Tinubu ya yi sun kasa domin bai ma yi tafiye-tafiyen da suke gabansa ba, domin kuwa yana bukatar ganawa da kuma tattaunawa da sauran shugabannin kasashen duniya.
- Ana ɗar ɗar Kan Mutuwar Sojoji Bayan Da Tirela Ta Kwace A Legas
- Fatara Da Talauci Na Yi Wa ‘Yan Nijeriya Miliyan 13 Barazanar Fadawa Kangin Talauci A 2025 — Rahoto
Wasu ‘yan Nijeriya na adawa da kuma kokawa kan yadda Tinubu ya dukufa yin tafiye-tafiye daga wannan kasar zuwa wancan, da ke janyo asarar makuden kudaden sufuri dukka da sunan nemo masu zuba hannun jari a Nijeriya.
Zuwa watan Mayun 2024, Tinuhu ya shafe kwanaki 96 a kasashen waje tun bayan da aka rantsar da shi a kan mulki, inda ya ziyarci wasu kasashe fiye da daya.
Tinubu dai ya ziyarci kasar Faransa, Ingila, Guinea Bissau, Kenya, jamhuriyar Benin, India, Hadaddiyar Daular Larabawa, Amurka, Jamani, Ethiopia, Senegal, Katar, da kuma Netherlands.
Da yake magana ta cikin shirin siyasa na talabijin Channels, ministan ya ce, shugaban kasa bai yi wasu tafiye-tafiyen da suka isa ba.
“Har yanzu wannan gwamnatin sabuwa ce. An rantsar da shi a 2023. Ta fuskancin duniya har yanzu shi sabon shugaban kasa ne. Yana bukatar tattaunawa da ganawa da takwarorinsa domin gina alaka mai kyau a tsakaninsu, sannan kuna iya ganin amfanun irin wadannan tafiye-tafiyen.
“Za ka sake tafiya ka samu zuba jari na dala biliyan 2 kamar yadda ya yi a Brazil. A zahiri, ba mu ma yi tafiye-tafiyen da suka isa ba. Ina ba da shawarar mu sake yin wasu karin tafiye-tafiyen.
“Nijeriya tana da dinbin dukiya. Nawa ne tafiyar zai lakume idan aka kwatanta da amfanin da hakan zai samar. Sannan, yanzu nawa ne ma kudin idan ka kwatanta da abubuwan da shugaban kasa ya riga ya shawo kansu.
“Nawa muke barnatarwa a tallafin mai, wutar lantarki da sauran tallafi,” ministan ya tambaya.
