Rundunar Sojin Haɗin Gwiwa Ta Ƙasashe Ta Kashe ‘Yan Ta’adda 15 A Borno

Rundunar tsaro ta hadin gwiwar kasashe (MNJTF) da ke aiki a karkashin ‘Sector 3’ a Mongunu ta kashe karin wasu ‘yan ta’adda 15 a wani hari da ta kai a garin Kukawa na jihar Borno.

Sanarwar da babban jami’in yada labarai na rundunar MNJTF, Lt.-Col. Olaniyi Osoba ya fitar, ya ce sojojin tare da hadin guiwar rundunar sojojin sama, sun dakile tare da kashe wasu mayakan ISWAP da suka gudu bayan samun raunuka.

• ‘Yansanda Sun Ceto Fasinjoji 14 Daga Hannun ‘Yan Bindiga A Katsina
• An Fitar Da Tsarin Hadin Gwiwar Kasa Da Kasa A Fannin Raya Masana’Antu Da Rarraba Hajoji Na Beijing

Ya ce, a yayin farmakin na sama da kasa, rundunar ta samu nasarar kai hari tare da dakile wasu ‘yan ta’adda da ke dauke da makamai da kuma raunata wasu a kan babura yayin da suke taruwa a Guzamala.

Lt.-Kol. Osoba ya kara da cewa, a wani samame na kasa da sojojin suka kai, sojojin sun kashe karin wasu ‘yan ta’adda 15 tare da kama daya da ransa a lokacin da yake yunkurin guduwa bayan samun karin raunuka.