Ruwan-wuta: ‘Yansanda Sun Kashe ‘Yan Ta’adda, Sun Kubutar Da Dabbobi 110 A Katsina

Rahotanni sun nuna cewa, an kashe ‘yan ta’adda masu yawa, sakamakon mamaya da ruwan-wutar da ‘yansanda suka yi musu, sannan kuma wasu da dama sun ji munanan raunuka a harin da ‘yansandan suka kai wa masu garkuwar a kauyen Dadawa da Barkiya da ke karamar hukumar Kurfi ta jihar Katsina.

Jami’in hulda da jama’a na rundunar ‘yansandan jihar, SP Gambo Isah, ne ya bayyana wannan labarin a wata takardar da aka raba wa manema labarai.

• IGP Alkali Ya Kaddamar Da Horas Da Jami’an ‘Yansanda A Borno Gabanin Zaben 2023

SP Gambo ya kara da cewa, sun kubutar da dabbobi 110 wadanda ‘yan ta’addar suka kwashe, lokacin da suka kai hari a wadannan kauyaku guda biyu.

Bayanin ya ci gaba da cewa,:”Bayan mun samu kiran waya cewa, wasu ‘yan bindiga da yawansu ya kai tamanin a kan babura, da muggan makamai, suka fara harbin kan mai uwa da wabi a wadannan kauyuka, jin wannan labara, jami’an ‘yansandan wannan yanki suka daura damarar yaki suka tunkari masu garkuwar, nan fa aka yi ta musayar wuta, inda ‘yansandan suka samu nasarar kashe wasu daga cikin masu garkuwar.

“An kashe masu garkuwar da yawa wasu kuma sun gudu da mananan raunuka. Rundunar ‘yansanda na ci gaba bincike a dajin domin kama wadanda suka gudu da raunuka a jikinsu.”

Jami’in hulda da jama’a na rundunar ‘yansanda CP Idrisu Dabban Dauda ne ya bayyana haka a lokacin da yake jinjina wa jami’an tsaron bisa wannan kokari da suke yi na kawo karshen ta’addanci a dukkan fadin jihar.