A ranar Jumma’ar nan ne gwamnatin Saudiyya ta bai wa Nijeriya kyautar dabino tan 50 a yunkurinta na inganta dangantaka tsakanin kasashen biyu.
Jakadan Saudiyya a Nijeriya, Faisal Ebraheem Alghamdi, ne ya mika dabinon yayin wani biki da aka gudanar a Abuja.
- Gini Ya Danne Magina 15 A Jihar Kano
- An Kaddamar Da Bikin Nune-nunen Shirye-shiryen Bidiyo Da Sinima Na Kasar Sin A Kasar Serbia
A cewarsa dabinon kyauta ce daga Sarkin kasar, kuma Babban Hadimin Masallatan Harami guda biyu, salman Al-Saud. Ya ce gwamnatin kasar, ta hannun Hukumar Bayar da Agaji ga Kasashen Waje ta Kasar (KSRelief), ta jima tana bayar da tallafi ga gwamnatin Nijeriya ta fuskoki da dama.
Ya ce daga cikin irin shirye-shiryen, akwai tsarin tallafi na Et’am, wanda ya tallafa a watan Maris shekara ta 2024 da abinci ga mutum 5606 a jihohin Kano da Jigawa da Katsina da Borno da kuma Abuja, wanda ya lashe Dalar Amurka 400,000.
Haka kuma a cikin sanarwar da ta fito daga ofishin jakadancin kasar a Najeriya ya ce Cibiyar Jin kai ta Saudiyya na shirin yin gangamin bayar da tallafin lafiya a Abuja da kano da kuma Legas, kuma za a yi ne a watanni uku karshen cikin shekara ta 2023.
Da yake karbar wannan kyautar dabinon, mataimakin darakta mai kula da yankin kasashen gabas ta tsakiya a ma’aikatan kula da kasashen waje, Ambasada Murtala Jimoh ya nuna godiyarsu ga gwamnatn Saudiyya inda ya ce Najeriya da ‘yan Nijeriya suna godiya da wannan gagarumin aikin na jin kai.
Ya kara da cewa dabinon za a mika wa ma’aikatan jin kai
“A cikin ma’aikatan ne, za mu tabbatr da cewa duk wadanda suka cancanta sun samu wanda za su kasance mabukata ne da suke bukatar dabinon,” kamar yadda ya fada.
